سالته ليه بقلم الشاعر عبدالعظيم السيد خليفة

 ساكته ليه

ساكته ليه ياحبيبتي 

اتكلمي

وقولي انا بحبك

عينيكي قالتها من زمان

وانت رافضه تنطقيها

دا انتي روحي

وانت قلبي

وانت الدنيا اللي بحلم بيها

من زمان واحنا لسه صغيرين

لسه فاكره ولا نسيتي

إسألي الساقية اللي كنا بنلعب 

عندها

إسألي شجرة الكافور

اللي كنا بنجلس تحتها

فاكره لما رسمت قلبين 

في ورقه بيضه وناولتهالك

إسألي خدودك من الخجل

كان لونها ايه وقتها

ولا ايدك لما كانت بترتعش

وانت رايحه تمسكيها

ولا دموعك لما سالت

علي خدودك 

من فرحتك 

مين ساعتها اللي مسحلك 

دمعتك

خلاص كل دا اتنسي

مُش هعاتبك

ولا هخاصمك

ولا هلومك

ولكن 

هشكي قلبك لعيونك

اللي قالت اللي كان نفسي 

اسمعه

هشكي قلبك لرموشك

اللي بتخالف ظنونك

وانت دايماً بتكذبيها

هو ممكن في يوم اخونك

ليه ياحبيبتي تزعليني

ليه رافضه تقوليها

الكلمه مرسومة علي شفايفك

وعايزه تقولها

ليه تمنعيها

ان كنتي بعد العمر دا

ومكسوفه تقوليها

اغمضي عينيك وانطقيها

ولا اكتبيها في ورقة

وارسليها

هنتظر تقوليها

او تكتبيها

ولأخر العمر هنتظر

ولا في يوم هايصيبني الاحباط

بيني وبينك رباط

عُمر السنيين ماهاتقطعه

سلام ياحبيبتي

اللي ان نلتقي

حروف بقلم الاديب عبد العظيم السيد خليفة المحامي