رحلة خسرانه بقلم الشاعر منصور ابو عبدالله

 رحلة خسرانه

          بقلمى 

منصور ابو عبدالله 

***************

جاى تبكى حالك دلوك وتسأل ايه جرالك 

وتشكى من وجعك وتندم على اللى فاتك 

جاى عاوز تميل  وقت كل الدنيا بصالك 

سيبت نفسك للزمن يكسرك ويوريك مرارك 

****************

كمان الهم دلوك بقى طاقه طاقين 

واللى كسبان فيها مطبلاتيه وكدابين 

وانت معملتش حساب  للغدارين 

وكأنك كنت أعمى مش بتشوف بعين 

*****************

يا انا ميلة الجدع ملهاش قومه تانى 

ومتقولش انا كنت وكنت فى مكانى 

عشت سنين كتار وكأنك معشتش ثوانى 

وظلمت نفسك لما اتكسرت وكنت انانى 

******************

حبيت كل الناس ومعملتش لليوم دا حساب 

انت اللى كتبت فى الحكم الف كتاب وكتاب 

واتارى الصبر والاصل والزين شئ كان كداب 

اوعاك تزعل وتقول فى حد يستاهل يوم عتاب 

*******************

اقفل على وجعك الف باب وباب 

ومتقولش دول قرايب ودول احباب 

انت شيلت ذنبك و جدع قلبك لو تاب

كنت شايف بكرة حلو اهو طلع سراب 

*********************

يا خسارة العمر اللى راح من غير فايده 

اتارى مشية الكداب هى اللى طلعت سايره 

عملت كل حاجه بطيبتك وطلعت بايره 

والاحلام اللى حلمتها جواك  صبحت طايره 

*********************

خليك اكتب على وجعك شعر ومواويل 

الجمال صوتها بيعلى من كتر التحميل 

وانت واخد الهم يامسكين صاحب أصيل

خسرت عمرك كله وصبحت من غير دليل 

******************

بقلمى منصور ابو عبدالله 

        رحله خسرانه