الطبيعة في الناس بقلم الشاعر عبد الكريم بركة

 الطبيعة في الناس .................. عبد الكريم بركة 

تَــسْـمَـعْ لَـكْـلاَمْ النَـاسْ تَـتْـعَــجَـبْ 

تَـشُـوفْ لأَفْـعَـالْهُمْ تَـبْـقَى مَـحْتَـارْ

تـَلْـقَـاهْ يَـحْـضَـنْ فِـيـكْ وَيَــرَحَـبْ 

تَـقُـولْ هَـذَا مَنْ غِـيرُه مَا اخْـتَارْ

تَـعْـطِيهْ بَـظْهَـرْ يَبْـدَا فِيكْ تَـغْـتَـبْ 

اللَـسَانْ عَـنْدُه سَكِينْ حَادْ الَاشْـفَـارْ

رَاهْ نَـسَـلْ الذِيـبْ بِينْ النَاسْ تَحَـبْ 

نْسَاو بَلِي هَذاك مَنْ اصْلُه غَـدَارْ

يَـجْـرِي دِيـمَا في الْمـَكِـيـدْة يَـنْصَـبْ 

مَا يَـوَالَـفْ الْـعَــشْـرَة لِـيهَا نَـكَـارْ

يَاكْ أعْـلاَ الشَـكْ فُـوقْ الثِـقَة أرْكَـبْ 

زَادْ الزَعَـافْ أقَـضَـى عَلَى الَاعْــذَارْ

ظَهَـرْ الَـوْجَـهْ وَاجَـمْ مَنْ الَـغْـضَـبْ 

مَا تَـقَـبَـلْ وَاشْ أَعْـطَـتْـلُـه الَاقْـدَارْ

يَـبَاتْ طُـولْ الِليـلْ كَامَـل يَـحْـسَـبْ 

طَـارْ حَـسَـابُـه مَعَ طُـلُـوعْ النَهَـارْ

يَظَلْ يَحْضِي في الْعِـبَادْ واش تَكْسَـبْ 

يَـدِي كَلاَمْ النَاسْ وَيَجِـيـبْ الَاخْـبَـارْ 

يَـلْهَـفْ فِي كُلْ شِي لـِيهْ يَـرْغَـبْ 

سَاكْنُه الَحْـسَـدْ بَقَـلَـبْ مَنْ الَاحْجَارْ

عَـنْدُه عَـقْـلِـيَة مَنْ طَبَعْ الَعَـقْـرَبْ 

يَـغْــرَزْ فِي سَـمُـه بَكلام الْعَـارْ

مُولْ الَاخْلاَقْ مَنْ طَبِـيعْـتُه مُـؤَدَبْ 

مَا يَـتَـأَثَـرْ وَلاَ يَـتْـقَـاسْ بَـالمِعْـيَـارْ

قِـيـمْـتُـه غَالِـيَـة حَتَى من الذَهَــبْ 

مَا تَتْـقَـدَرْ بَـثَـمَنْ مَا لِـيهَا أَسْعَـارْ 

يَـقْـدَرْ يَـكُـونْ مَـقْـطُـوعْ النْـسَـبْ 

تَـرَبَى فِي وَسَـطْ نَاسْ مَنْ الَاخْـيَارْ

مَهْـمَا فِي صَغْـرُه شَحَـالْ تَـعَـذَبْ 

كل ما فَـاتْ عَـلِـيهْ كَـانْ صَبَـارْ

قَـانَعْ بَشِي لِي نَعَـمْ عَـلِيهْ الـرَبْ 

يَـتْـعَــزْ بَالْـمَـوْجُـودْ بَكُـلْ اِفْـتِخَـارْ

يَـسْعَى لَفِعَـلْ الْخِـيـرْ لِيهْ يَتَـقَـرَبْ 

يَكُونْ رَزِينْ بعْـقَـلْ نَاصَعْ الَافْـكَـارْ 

مَا يَـشْبَعْ الْوَاحَدْ مَنُه كِـلْامه عْـذَبْ 

مَا يَرْوَى مَنُه لُوْ كَانْ حَجَمْ الاَنْهَارْ 

مَاشِي شَـلُـوقْ ذوقـه مَـالَحْ شـب 

ولا مَخَلْوَضْ بَمَرْجَة طِينْ الَابْـيـَارْ

صَادَقْ بَوَعْـدُه مَنْ عَـمَـقْ الَقَـلَـبْ 

شَادْ وَقْـرُه وَصَايَنْ حَـقُوقْ الْجَـارْ

عَـلَـمُـه الـزَمَانْ شْكُـونْ يـصاحَـبْ 

صَـدِيـقْ الْوَافِي لِي يَكْـتَـمْ الَاسْـرَارْ 

يَـرَدْ بَـجْـوَابْ من الصَـوَابْ مَهَـذَبْ 

المَـحَـبَة الصَافِـيَة نَابْعَـة مَنْ الَاغْـوَارْ

جَمَعَـتْ الَحْـرُوفْ مَنْ دَاخَـلْ الَجُـبْ 

نَـظَـمَـتْ كَـلْـمَـاتْ مَـنْهَـا اَسْـطَــارْ 

سَـمَـعَـتْ مَنْ كُلْ شَخَـصْ مَجَـرَبْ 

جَـرَدَتْ كُلْ شِي شَـافْـتُـه الَابْـصَارْ 

مَا عَـنْدَكْ َعَلاَش الْيُوم تَـسْـتَغْـرَبْ 

إِلاَ قَابَلَتْ شِي حَـدْ غَـرِيبْ الَاطْـوَارْ 

مَا تَسْمَعْ مَـنُـه غِـيرْ الشَتَـمْ وَالسَـبْ 

تَـوْجَعْ الْخَاطَـرْ وزَادْ تْ الَاضْـرَارْ 

الَكْـلاَمْ الـرَزِينْ مَنْ اللَسَانْ أَهَـَربْ 

افْعَـالْ الْمُـنْـكَـرْ في العـام بَالْجْهَـارْ 

رَاهْ صَارِي فِي هَـذَا الْقَـرَنْ الَعْجَـبْ 

عَـنْدَكْ مَا تَـسْمَعْ وَتْشُوفْ الَانْـظَـارْ

قَرَنْ الوَاحَدْ وَالعَـشْرُينْ الْحَقْ تَحْجَبْ 

أَرخَصْ دَمْ بَنَادَمْ في الْـبَاطَـلْ تَهْـدَارْ

مَا أَبْقَاتْ رَحْمَة وَلاَ حَـدْ يَطَـبْـطَبْ  

أرْجَـعْ قَاسِي مَنْ قَـسَاوَةَ الَاشْـرَارْ

مَاشِي كُلْ النَاسْ تابعة هَـذا الَموْكَبْ 

وَلاَ الكل يجْرَفْ مَعَ سـِيلْ لَمْطَـارْ

الْحَمَدْ لله مَازَالْ كاين الخَيرْ في اللُـبْ 

مَازَال مَوجُودْ صَفَاء في نَاسْ الاخْـيَار

طِـيـبْ النَفَـسْ بَحَسَنْ النَـيَـة يَغْـلَـبْ 

تَـزُولْ الظَـلْـمَة بَـشُـرُوقْ الَانْـوَارْ

يَعَـمْ الْـوَدْ بَرَكَـتُـه عَـلِـينَا تصَـبْ 

تَـعُـودْ السَـكِـيـنَـة تَـطْـفْى الَـجْـمَـارْ

يَـرْقَى لَغَــوْ اللَـسْـانْ بَـكْـلاَمْ الْحُـبْ 

تَحَـنْ الَقْـلُـوبْ بَعَـدْ طُـولْ الَاعْـمَار

اسْتَغْفِرْ الله الْعَـظِيمْ مَنْ كُلِ ذَنَـبْ 

اسْـتَـرْنَا يَا الـعَـالِي أنْـتَ الستـار  

فَـرَجْ عَـلِـيـنَا الله وَنَفَـسْ الْكَـرَبْ 

تَرَسَـمْ الْبَسْمَة بَرْجُوع لَهْنَاء الَـدِيَارْ