انا المواطن. الشاعر يحيى المنياوي

 أنا المواطن فلان... 

من زمن كان 

الحب فى كل مكان

غنوة على كل لسان 

ياما حلمت واتمنيت 

 وحلمى كان بسيط 

ضحكوا.. وقالوا عليا عبيط 

ازاي تحلم وملكشى فى الدنيا مكان 

هاتكون مين يعني.. وأبن مين..  

وينده صوت الحق.. 

  (الله أكبر) قولت آمين 

لاعمري حلمت اكون غني 

 ولا من الاعيان 

ولا حلمت اسكن فى قصور 

كفاية.. أعيش مستور

والستر أكبر نعمة للانسان 

وياما قالوا عنى فقير مغرور 

والفقر عمره ما كان يعيبنى 

حتى شوفوا أبنى 

دكتور ومهندس وفنان 

انا توب الشرف عندي 

اغلى من ميت فدان

ياما اتحملت من الدنيا قسوة 

 والصبر عشته كتاب وديوان 

 رسمت خيوط الامل.. 

 والصعب كنت بشوفه سهل

 يوم بنام فى الضل 

 ويوم بنام فى الطل 

ولا عشت فى يوم جبان 

ومين يمسح دموع عنيا 

الا بايديا.... 

مين فى يوم هون عليا 

أو قال اشيل عنك شوية

مين يرجعلي ضحكتى 

 الي كانت طالعة فى العنان 

وسنين من العمر.. 

 تعدى تمر .. زي الرهوان 

مين يرجع الأمان 

الشعر شاب قبل الأوان 

وحلم الشباب..

 شب فى كتاف الصعب

بس الريح هب 

سكن اليأس.. قلب العطشان 

وآه .. من غدر الزمان.. 

وآه .. من الدنيا والايام 

وآه ومليون اه.. اتغير الاتجاه 

الحلم.. أصبح مجرد حلم

اصبح ذكرى..

بس انا جوايا فكرة 

والفكرة طلة لبكرة 

جوايا الإنسان 

جوايا حلم وتمني 

ازرع واصنع وابني 

لابنك وابنى

الدنيا تعمر.. والكون ينور 

وتعيش بلادي 

مجد وفخر وعرفان 

مش مهم اكون مين ..او أبن مين 

ولا مهم اسمى او عنوان..  

يكيفى أني.. انا المواطن فلان...

بقلم / يحيى المنياوى