ملك الموت بقلم الشاعر جاسم ثعلبي

 ملك الموت

ضغط   گلبي   صعد  و   إتهدّه  يا دكتور

السماعة    تزعجه   و     أحس     تأذيني

أسرار   إهواي   حامل   كنز   حبّي  المات

أعتقد  بس   نبض     شرياني    اليواسيني

أشوف   إمبيّضات  إمن   الحواري  إحذاي

وحدة   الوحدة    تلزمني   او     تهدّيني

و أشوفك  لابس   إنگاب   و  أثاث إهواي

مگاريضك      بديك     إتصوّر      إبعيني

اللّه   إعليك   سكّن   جرحي   دمي  إيفور

اذا     غاب      الوعي     بيدك     تحنّيني

إبفتح  باب  الگلب  تاجد   صحيفة إهناك

أسامي   أحباب     عمری     و    التباريني

الهلي و  أصحابي   إكشف  لا   تضم مستور

إخفي  إسم   الحبيب   إحروفه    تچويني

إنطرحت إبدون علمه إعلى السرير  إحذاك

ما   يدري    إبمصابي   او    عينه    تربيني

توكل   أنا   للّه   و     العمر     محسوب

عدل   أرجع     عليه     ميّت    يعازيني

خدر جسمي او گطعت الضنّة من دنياي

عليك     اللّه     طبيبي     لا     تعرّيني

أحب   الموت   لاكن   للحبيب    أشتاق

أود  أرجع  و   أشوفن    فرحته  إبعيني

نزل قلمي او سقط  بإلدفتر  او  سكريت

او   مگاريض    العمل     گامت   تغنّيلي

أحس گلبي نطق  و  إيصيح  أريد إهواي

إبحلم زفتي  إعلى   بيته   او  ظل يدليني

شبگته او  گتله  إعذرني   إنتهيت   أوياك

صرخت إبإسمه  أنادي  او  فكري  إبديني

فتحت إعيوني  شفت  إمّي   تهلهل   حيل

تفرّچ    بيدي     و    إبهمسه    تحاچيني

طافاني   الخطر     تركاني     ملك     الموت

الألم     من     ذكريات    الحب   تداويني

جاسم ثعلبي الحسّاني (جاسم محمّد الحسّاني) 30/09/1402