( مبروك عليكي )

بقلمي :

.........

مبروك عليكي إللي إتولد 

وعلى سلامتك بنت أو ولد

بحسه يملى مكانك ونس 

مهواش زيادة وكمالة عدد

جاي برزقه ليكي السند 

من نطفة طاهرة بصبر وجلد

كمل شهوره في عددها تسعة

مكتوبله ميعاد فيه يتولد 

  

جه بالمشيمة وبالحبل شابك

داوي ببكوة فرح سكاتك

راشق بعطسة بعد المتاعب 

شاف دنيته شرف وجالك 

صح بدنك بزغاريت حماتك

لافه بطنك بحزام جمالك 

خف وزنك لمشية نعامك

بوسة في جبينه من حنانك

فطرتي بالأمومة كانت صيامك 

واللفلفة واخده بالك وإنتباهك

من شر حاسد ليه دعاكي 

تاه الوجع بصبر إنتظارك

الوئوئة موش حابه السكون

ترويض سكوته بطولة لبال 

بحضن دافي هادي في أمان

النوم ليكي بقي صعب المنال

 

قاعدة فوق سريرها متسعنة

مشغولة وبنباهة بترضعة

عايزاه ينام بهدوء في المكان

متشملله بالهشتكة بتنططه

جه وكأنه عارف يوم سبوعه

يحتفل بفرحة ميلاد وجوده 

خايفة من نظرة تحسد تشوفه

قامت بالمكحلة تمرود عيونه

وكوافيل بالكلف أخر شياكة

الجدة باللفف واقفة متجهزة

لحاجته عارفه عنها تسعفه

وقعت الصورة رحمة ألامه

كمل بخير وحان سبوعه

والزينة بألوانها حواليه تزينه

والفوره بعسلها طعمة ولذيذة

بصحون مليانه بكرم الكريمة

وأطفال تغني بأصوتها الرقيقة

وبإديها بلونات بدوران وظيطة

لكلام أبوه وأمه يتسمع ياتيته

والعروسة الورق تتخرم بعودة 

 

والمصحف يحفظه من الفزع

والنعمة ليعيش حياته في شبع

والسكينة تضويها أنوار شموعه

يداعبها الصفا في مية سبوحه

والفضة محفوظة فى الكياس

العايمة بمية الطشت النحاس

والمبخرة فاحت بروايح نفيسة

والملح يمنع من نظرة مساس

والكـروت مكتوبة مولود نصوح

مع خلطة حمص وفول صبوح

والحلوى والفشار بفوانيس تلوح

وغربال للهزهزة بحجاب صلاح

بتخطي رايحه جايه متنبهة

شايفه روحها ببهجة مترنمة

والهون يدق بانغامه المدوية

بصوت الصغار أغاني مفرحة

يارب ياربنا بصحة يبقى كدنا 

ومعانا تسعد حياته بالهنا 

يكبر ويلعب في وسطنا

ويعيش ويتربى من حظنا

..........................

احمد الشريف حسين