كان زمان بقلم الشاعر صبري حسين

 ( كان  زمان)كلمات/صبري حسين

فاكر زمان

لما كانوا الجيران

اكتر من الاخوان

كل الشارع عارف بعضه

ياخدوه من بعض ويدوه

مافيش حد كان عايش لوحده

كان بينهم احترام

لما يتكلموا مع بعض يفوح عطر الكلام

حتي اوقات الخصام

الكل بيتعامل بااحترام

طول ما انت ماشي تسمع السلام

لكل وقت كلام

تقول صباح الفل يا عم محمد

يرد  بااحلي رد

صباح الفل والياسمبن ياحج سعد

فينك يا حج

مش باين ليه

قلقتنا عليك

طمنا عليك وعلي الاولاد

ايه حال البنت سعاد

والله يا حج محمد

الكل بخير 

بيسلموا عليك

ماهي البنت سعاد

في نفس الفصل مع البنت وداد

ربنا يوفقهم ويصلح لهم الحال

عن اذنك يا حج سعد

انا رايح ازوار اخونا ملاك

عقبال عندك عمل نص اكليل لابنه مراد

عقبال اولادك يا محمد

واجب نروح نبارك ونهني

مبروك يا عم ملاك

عقبال باقي الاولاد

هاتي يا بنت الشربات

اتفضلوا يا اجدع اخوات

البيت نور   بالحج سعد والحج محمد

تعالي يا واد يا مراد

.سلم علي الحجاج

عمك محمد وعمك سعد

مبروك يا مراد

عقبال الليلة الكبيرة

لما تيجي في بيتك العروسة

عقبال عندكم يا اعمامي

لما افرح بااخواتي

فاطمة وطة

واحمد واسماء

عقبال باقي الاولاد يا ملاك

بقولك ايه يا ملاك

ايه اخبار اخوك عياد

عايزين نروح نسلم عليه

هانروح نصلي العشاء

نرجع من المسجد  نرن عليك

ياللا يا محمد 

هو. ده حال الجيران

كانوا اهل واخوان

مساء الورد

مساء المسك والعنبر

مساء السكر

يا احلي من السكر

مساءك شهد مكرر

هو ده عطر الكلام

كنا نعرف معني الاحترام

كنا نراعي حق الجار

لما البنت كانت ترجع من مشوار

في الليل او. النهار

كان الكل يحافظ عليها

ولا في واحد يرفع عينه فيها

كل شباب الحتة اخواتها

خلي حد كدة يقرب منها

فاكر لما يكون في فرح

كل الشارع اصحاب الفرح

الكل واقف فرحان

يرقص ويغني اجمل الالحان

كلنا اهل وخلان

كنا نشارك بعض في الفرح والاحزان

اتقلب حال الزمان

وبقينا نشوف العجب

قرأن بيقرا  في صوان

وجنبه فرح الكل بيرقص فرحان

الجار مش عارف جاره

الكل قافل علي نفسه بابه

اتشقلب حال الزمان

لا عاد رحمة ولا حنان

عايشين في التوهان

ضاع مننا العنوان

بقينا اغراب لا نعرف اهل ولا جيران

احنا اللي كان بيضرب بينا الامثال

اتبدل بينا الحال

يا كل الجيران

عايزبن نرجع زي زمان

اهل. واخوان

نعرف حق الجيران

صبري حسين