آخر كلام بقلم الشاعر يحيي حسين
آخر كلام
بقلمي يحيى حسين
شاغل بالك بيها
بقلبك وانت وحيد
والوحدة تمرمط فيك
وخيالها ما بيحيد
عجيب كلام قلبك
زي غثاء السيل
لا عمره يروي عطش
أشرب وعطشي يزيد
عجيب نبض قلبك
قاعد يكلم نفسه
ما حد سمع صوته
لما حيسمع همسه
دوشنا بكتر الكلام
عن بكرة وأحلامه
يا ريت يبطل كلامه
وخليه هنا بأمسه
بطل بقى واتلم
بلاش تكون متطفل
مزنوق في خانة اليك
والدور عليك متقفل
هو إمتى الحظ
خبط على ابوابك
إنسى إنك في مرة
تسرقه وتغفل
عامل نفسك طبيب
دكتور إستشاري قلوب
لم نفسك عيب
قلب البعيد معيوب
بتوصف للناس الدوا
وانت دواك غالي
وياما الغالي جرح
والقلب كله ندوب
ياريتك بتعرف تكذب
وترص الكلام ياريت
لكنت ملكت القلوب
واستعمرتها وغزيت
ولكن كلام قلبك
صدقه يفوق الحد
قلبك يقول الصدق
زلزال يهد في بيت
أحسن خلاص اعتزل
كلامك دا كله خيال
جرب تعيش الواقع
ما فيش حصان وغزال
ضيعت عمرك هدر
والعمر كان واحد
يا خسارة ضاع العمر
والحلم أكون خيال
يحيى حسين القاهرة
30 سبتمبر 2022
مرسلة بواسطة مجلة فضاء الفكر @ مارس 09, 2023
0 تعليقات
0 تعليقات:
إرسال تعليق
الاشتراك في تعليقات الرسالة [Atom]
<< الصفحة الرئيسية