ليه...??بقلم الدكتور عمر عبد الجواد
..... (( ليه ؟؟ )) .....
حبك ليه .. بتداريه
بتمني قربك مش لاقيه
إيه... اللي مانعك
و قلبك إزاي يطاوعك
لو بُعدك عني نافعك
بيع حبك و أنا شاريه
..... حبك ليه .... بتداريه.....؟
لا الشمس في بعدك بتظهر
و السما ما بترضي تمطر
علي بعادك أنا ما أقدر
قولي أعيش ليه
....... حبك ليه .. بتداريه......؟
أنا عنك ما داريت إحساسي
ما إنت أهلي وكل ناسي
و زعلك علي عيني وراسي
عايزني أعمل إيه .
. .....حبك ليه .... بتداريه.....؟
ٔأنا رشيت الميه في الدار
و مليته مسك وعطر وأزهار
لو عايزني أعملك زار
أرحم من اللي أنا فيه
....... حبك ليه... بتداريه........؟
ليلي في بُعدك بيطَوِل
أكتر بكتير من الأول
وقلبي عنك ما إتحول
ليه ... تأسي عليه
.......حبك ليه.. بتداريه...... ؟
عيني ما بتشوف النوم
و يعدي يوم ورا يوم
و الناس ما تبطل لوم
سايبني ...لوحدي ليه.
...... حبك ليه.... بتداريه.....؟
أٔشكي لمين همي
نشفت ريقي و دمي
و شمت فيا خالي و عمي
بتعذبني بحبك ليه
......حبك ليه... بتداريه.......؟
تعالي و قرب مني
إشكيلي إحكيلي و طمني
وأنا اشيلك في العين و النني
و نتهني سوا بالحب و لياليه
....... حبك ليه ....بتداريه ...؟؟
★★★★★★★★★★★★★
د/عمر عبد الجواد عبد العزيز
مرسلة بواسطة مجلة فضاء الفكر @ مايو 15, 2023
0 تعليقات
0 تعليقات:
إرسال تعليق
الاشتراك في تعليقات الرسالة [Atom]
<< الصفحة الرئيسية