قبل منك بقلم الشاعر صابر الشناوى

 * * * قبل منك * * *

للشاعر /صابر الشناوي

قبل  منك  كنت

كنت بكتب شعري عادي

كنت بتحكم في حرفي

كنت برسم  بيه ملامحي

زي ما يجي في خيالي

كانت سطوري بتطاوعني

تمشي دايما زي  ضلي

كات  بنات الكون في نظري

زي  زهرات  الجناين

منها  أقطف كل زهره

لما  لحظه يبان جمالها

لما  كنت عليها أعطف

وف بنات أفكاري ياما

كنت  أحب ف العذاري

كنت أصبر في الحياري

كنت دايما  أقضي ليلي

وسط أفكار  السهاري

كنت بحروفي أطيب

في المجروحين

كنت ببدر كلامي يطرح

للطيور الشارده جنه

 لما كنت ادندن  بكلمتين

التقيها على كتفي تنزل

زي ما يكون عطشانه

تشرب من الحنين

كانت حروفي تملي

سهمي اللي مطاوعني

إن أغازل أو أجافي

كان تملي سن قلمي

صوته عالي في المحافل

في السياسه والرياضه

كنت أحارب بيه

تملي في الجحافل

الحروف  هي  هي

والقلم والقلب عاقل

إلا  عند عنيكي إنتي

إكتشفت بإن جاهل

والحروف مني بتهذي

مبقتش قادره على التواصل

السطور مني بتحود غصب عني

رافضه توصل لحد غيرك

عماله  تحلم  بالتمني

إن  أكون  ساكن ضميرك

تعترف بإراده  مني

قبل منك كنت

بكتب شعري عادي

والحب كان عندي عادي

والعشق كان شيء إفتراضي

دلوقتي حروفي تايهه مني

عماله توصف لك سهادي

مستني بس إشاره منك

توصلي  بودك  ودادي

ويبقى  باقي العمر  ليكي

والبدايه من الليلادي

البدايه من الليلادي