زينة لوشام الشاعر صلاح الدين سبولي

 زينة لوشام

زجل

محبوب خاطري ...

راني سارح في لحلام

عاشقك ولهان ...

قلبي ليك عساس خدام

مغروم بحبك ...

يا السمرة مولات لوشام

فيك عايش جوال ...

شوقك جابني ليك نبلغ السلام

خذيني في حماك ...

يا جناح لحمام

نفديك بروحي ودمي ...

نلقى فيك راحتي يا زينة البلدان

ترحبي بالصغير ولكبير ...

سخية وخيرك دايم عل الدوام

ديني معاك ديني ...

يا لعزيزة ديني

أنا مواطن ...

بلا بيك ذليل نولي

يا أملي ومرادي ...

نحضنك بين ايدي ونجري

أنت علامي ...

نرفعك قدامي

اناديك ...

لحنينة أمي

يا روحي وفؤادي ...

عليك نتجمعوا في فرح الأعياد

راه عيك ...

عيدي

يا مولات الصدر لحنين ...

حمليني على جبال كتافك وساريني

نشوف غاباتك ...

والويدان بحور

وسط ربيع النوار ...

خليني

راه ترابك دمي ...

لون شعار جدادي

عروقي خضرارك ...

منسوجة فيك نجمة

يا راية ...

امجادي

دفيني برملك الذهبي ...

يا الصحراء مولات التاج الغالي

يا أرض السلام ...

نغير عليك

بإذن الله ...

ينصرك ويحميك

حرة يا بلادي ...

نفتاخر بيك

يبقى شانك ...

لينا عالي .

صلاح الدين سبولي