على المعاش

 

وعّدا العُمر يجرى أوام

ونِقفِل صفحة الأحلام

ونِتفّرج على أفلام 

ساعات نهايتها تِرضينا

وصّلنا عند سِن معاش

عاشِتنا الدُنيا ما عِشناش

وكُل الدنيا ما تِسواش

مُجرد دمعه فى عينينا

عِرفنا فى حياتنا كتير

وللكِلمه فيه مِيت تفسير

نِساعد غيرنا فى التفكير

وللِخير ماشيه خطاوِينا

تِعِبنّا والمرّض بيهِد

وخطوِتنا بطيئه بجّد

وصِحتنا بقِت ع الأد

وبانِت رعشّه فى إيدينا

قلوبنا عند سِن شباب

عقولنا واخده بالأسباب

ساعات نِضحك بلا أسباب

ساعات نِنسى أسامينا

نِصلى فروضنا فى ميعادها

هدفنا الروح وإسِعادها

وقرأن القلوب زادهّا

وسجّده فى عِز ليالِينا

وعّدا العُمر يجرى أوام

تعالىّ نِحاسب الأيام

هيِفضّل فى حياتنا كام

ولّو طاااالت أمانينا

كلمات أحمد شاهين