تفتكري. الشاعر أشرف عيسى

 تفتكري.

تفتكري إني مش هاعرف أنساكي..

ولا أعرف أقسي قلبي عليكي طول ما أنا بهواكي. 

اصطبري حبة تبقي معرفتنيش أنا مهما كنت بادوب في هواكي.

في لحظة أنقلب عدو خطر عليكي بعد ماكنت اصحي بروحي فداكي..

_تفتكري إني مش هاعرف انساكي_

وأحب غيرك واحدة لا عشرة أقل واحدة فيهم تهد كل بناكي..

وجمالها من غيرصراخ يوقفك عند حدودك ياللي كنت بهواكي.

انتي افتكرتي إني حبي ضعف لأ فوقي أنا ضعفي انتهى معاكي..

_تفتكري إني مش هاعرف انساكي_.

لما لقيتك ماسكة ايديه وبتضحكي وأنا قدامك واقف في شباكي..

ويمر يوم وكمان وراه عشرة وانا مصدوم من اللي عملتيه في قلبي اللي خدتيه معاكي..

وانت ماشية في طريقك فرحانة ومش عارف مصيري ايه وياكي.

_تفتكري إني مش هاعرف انساكي_

هابيجي يوم هاشوفك بعيني ودموعك نازلة من عينك نار تهد قواكي.

وهاتتوسلي لكل حد كنا نعرفه أني بس أقبل صدفة أتعاتب معاكي.

وهالوعك وهاخليكي تشكي لأي حد من مر عمايلي معاكي.

خلاص سلامك إنتهى من يوم غرورك ما سكن جواكي..

_تفتكري إني مش هاعرف انساكي_

هاتبكي على إللي راح واللي جاي مهما بكيتي عليه مش هاكون فيه وياكي.

من غير سلام باهجرك ندمك مش هايرجعني تاني أهواكي.

واحذري مرة أشوفك ولوصدفة واقفه مع حزنك تحت شباكي..

صدقيني لو فيه فرصة تانية للحب يخش قلبي صدقيني والله ما هاتكون معاكي. .

__وساعتها هاتعرفي إني عرفت أنساكي__

أشرف محمود عيسى