رم مقلوب . الشاعرة سوزان محمد

 قصيدة ( صار الهرم مقلوب )

==================

حال ابن آدم عجب

كان الطريق مكتوب

قفَل الكتاب و اتقلب

بان الكتاب مشطوب

الأصلى عنه اتحجب

عايش على المضروب

مامشيش ورا الكتالوج

نصاب عليه منصوب

الفطرة إتشقلِبِت

و الغُلب صار مطلوب !!!

ساب سِكِّة المختصَر

تايه سنين فِ دروب

شقيان يريد الشقا

و مزاجه بالشقلوب

الصعب كل الخير

و السهل كله ذنوب !!!

و يفزلِك الفزلَكه

علشان يبان موهوب

كان النعيم فِ إديه

و الحلو كان مسكوب

دلَق الحلا طب ليه

يبكى على المشروب !!!

فاتت سنين و سنين

دلوقت هو يادوب

خايف تفوت السنة

يتقال عليه كركوب !!!

فادت بإيه الدندنة

علشان يبان محبوب

لو هو كان أو أنا

جواه مِعبِّى عيوب

عايز يعيش رَوشَنه

صابر غلَب أيوب

حلو الدلع و الهنا

أيوا الدلع مرغوب

لكن كتاب ربنا

من وقتك المحسوب

لو ثانية تجرى عليه

تلاقيه شَمال و جنوب

ركِّز شويه عليه

قلبك يطيب و يدوب

ربك حنين أوى

بس الشيطان لهلوب

عايزك فى قلب الفرح

عايش حزين منكوب

أصل الشيطان غِيِّتُه

يقلب كيان مَصبوب

كان الهرم ع الأرض

صار الهرم مقلوب ... #بقلمى #سوزان_محمد