منام الشاعر ياسر أحمد

 شوفت منام أحترت انا فيه

افتكره وراح احكى عليه

شوفت انا طاير زي الطير

شايل غصن زيتون اخضر

مليان حب ومليان خير

طاير فوق مدينه جميله

فيها مبانى عريقه اصيله

فيها القدس وفيها الأقصى

وفيها النخل والزيتون

فجأه وان طاير وبسبح

طلعوا عليا غربان الشوم

قالو ارحل ماتقرب 

واوعي قعادك هنا يدوم

قلت اشمعنى  ومالكم يعني

هي القدس ملك جدودكم

ولا القدس دي ملك الغير 

لا والله ماأطير وأسيبها

هو انا اقدر اعيش من غيرها

انا من غيرها حزين  مقهور

وابقى جريح بجناح مكسور

انا لواشوف حد مزعلها

بجري عليها وامسح احزانها

بكره تشوفوا انا ح اعمل ايه

رايح افديها بروحى ودمى

رايح افديها بكل جميل

وده كلامى  حاسبوني عليه

لو ماعرفتش منكم أحميها

يبقى اعيش انا اعمل ايه 

ضحكوا وقالو ده طير كداب

اوعو فى يوم تعملو له حساب

فاكرين لما حرقنا الأقصى

حد اتحرك ولاأتعصب

دول اموات وضميرهم مات

او عايشين من غير احساس

زي الدنيا مالها اساس

قطع لسانك ياغراب الشوم

احنا خلاص هانفوق من النوم

فاكرين يوم سته اكتوبر

لما الجيش المصري هزمكم

في ست ساعات رغم الصوم

فاكرين لما بارليف اتحطم

واكتوبر بقي ليكم مشؤم

فاكرين لما قطع احلامكم

وطير من عيونكم النوم

راح اوعدكم بكره القدس راح يتحرر

وانسي الامي وكل جراحي

وده مش وعدي ده وعد الهي

يعني القدس راح تتحرر

وحتى سماها  من الغربان

وانزل على بحرها انا  وأشرب

ده انا للحريه كتير عطشان

احنا صبرنا والصبر جميل

واللي بيصبر بكره يكون رابح كسبان

🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬

بقلمي ياسر أحمد