أسعد الله أوقاتكم.:كلمات : الحاج خليل محمد غريب

 أسعد الله أوقاتكم.

بمناسبة عيد الغدير الأغر ،عيد مبايعة أمير المؤمنين علي بن أبي طالب(ع)، أعاده الله على الموالين لآل بيت محمد(ص)،بالخير والتوفيق والنصر وثبَتنا على ولايته ونهجه الى يوم الدين.

تعوّذ يا قلبي بربّ غفّار ورحيم 

من شرّ نفسي وشرّ شيطان ٍ رجيم

وصلِّي وسلّم دوم عأفضل رسول

عالمصطفى العدنان عالأُمي العظيم

وبارك ومجِّد طُهر هالزّهرا البتول

بنت الرسول اليعربي أفضل حريم 

وسلّم على أولادها ولاد الأصول

أفضل وأطهر قوم جنّات النعيم

وحتى يحق الحق ويتمّ القبول

سلّم على حيدر أمير المؤمنين 

باب المدينة وحافظ الدُرّ الكريم

من بعد ما حجّ الرسول وعاد

ومن قبل ما يوصل على أرض الجهاد

هبط جبريل حامل مسألي

وبلّغ رسول الله يشرح للعِباد

وقلّو وصيّ الدين لازم ينجلي

ولازم تبلّغ أمر ويتم المراد

ولوما قُلت او بلّغت أمر العلي

بتكون ما بلّغت والتشكيك زاد

لازم الكُل يبايعوا صهرك علي

زوج البتول الطاهرة وبيّ الحسين 

وداحي بواب الخيبري وكر الفساد

وبخُم جنب الغدير الطاهر المدرار

وقفوا الجمع تايسمعوا المختار

لمّا صعد عالمنبر وسطحو اعتلى

وصاح بصوت جبّار يا حُضّار

مش ابن هاشم وليّكم؟

قالوا مبلا 

قال وشبك كفو بقبضة الكرّار

اللي انا مولاه تفكيرو انجلى

حيدر علي مولاه خاذل الكفّار

يا رب انصر ناصرو وزيدو صِلا

ويا رب أخذل خاذلو وهينو

بحكمك وعدلك إِنِت يا قهّار

ومن بعد ما أنهى النبي نص الكلام

اللي أنزلو جبريل ع خير الأنام 

أوصى الخلق حتّى الإمام يبايعوا 

ويبارِكوا ويتباركوا بأفضل إمام

وصاروا ع خيمة بو الحسن يتدافعوا

ويتسابقوا مين النّخي ومين الهُمام

وعَقْدوا العزم حتّى الإمام يطاوِعوا 

ب كلمة بخٍ ، عمّ الأمن عم السلام

ونزلت الآية مُحكَمة عَ مْسامِعو

اليوم تمّت نعمة المولى القدير

وأصْبح الدّين المرتضى الإسلام

مين أفضل من علي بعد النبي

حتّى يكون مْكَلّف بهالمرتبي

ومين ممكن يقدر يكفّي الطريق 

إلّا علي ال بيدار بو القاسم رِبي

ومين متلو كان للهادي رفيق

وأوّل شخص أسلم بعد طه النبي

ومين اللي جندل رقبة الزنديق

عمر بن ودّ العامري الغُرّ الغبي

ومين اللي أخلص للنبي في وقت ضيق

ونام بفِراشو وقال إبشِر يا رسول

حيدر علي يمّا المشايخ والعُبي؟

وليش ما بدّو علي يصبح أمير

ويصبح خليفة بعد سيّدنا البشير

مش لعلي بولادتو انشقّ الجدار

وبطُهر طلّ الطفل كالبدر المنير

مش لعلي ترغل البلبل والكنار

بوقعة بدر وبوقت تقرير المصير

مش لعلي بالحق أُنزِل ذو الفقار

حتّى الما صار بأُحُد وبحدّو يصير

ومش حيدرة اللي كان للعدنان جار

وصهر وشقيق وابن متواضع شريف

ومرجع فتاوي العلم والتّفسير

يا سيّدي بهالعيد قلبي شو انتظر

يقدّم تهاني للإمام المنتظر

يعاهد إمام الحق وِحْدَعشر إمام

إنّو عمنهج بو الحسن بالمختصر

يِبقى وفي غيّور عالإسلام

لولا فِني أو مات بِعْتبرو انتصر

يا رب إنت الوحي والإلهام 

إنْتْ العَطَيْت العقل وِعْطَيْت البَصَر 

منحني الهِداية بحق والإِنْعام

وثبِّت على هالدّرب سَيْري وخطوتي

مهما كْبِرْت وْشَحّ عقلي والنَّظر.

كلمات : الحاج خليل محمد غريب